تليفون: (+2) 01110005203

حكاية الست هـ وحضرتي شاهد عيان

الست هـ انسانة بسيطة وعفوية وبفطرتها جدا، بس هي مريضة ضغط وسكر مزمن وبتحاول تحافظ علي نفسها وبتلبس كمامة وبتستعمل مطهر بس بردوا علي قدها في محافظتها، اما زوجها فراجل علي قد حالة وولادها اكبرهم في الجامعة.
وفي يوم الست هـ تعبت وباختصار جالها كورونا لكن مش لوحدها دي اتعدت، بس من مين دي مش بتخرج من البيت… الست هـ اتعدت من ولادها لانهم بيخرجوا من غير كمامات وطبعا زوج الست هـ كمان اتعدي بس هو مش مقتنع انها كورونا وبيقول دي شوية برد والست هـ كلمت 105 وخدت العلاج وبتدهوله بالعافية.
التعب زاد علي الست هـ ولانها مريضة ضغط وسكر ظهر عليها الفيروس اكتر وعملت ماسحة والنتيجة ايجابي كورونا، وبتاخد علاج وصرفت كتير علي الدكاترة في العيادات الخاصة وطبعا الحال علي القد والمصاريف بتزيد وزوجها بلاش مستشفيات وكام يوم وتخفي.. بس التعب علي الست هـ بيزيد.
الست هـ قعدت في البيت وخدت العلاج بس مفيش تحسن وضغط وسكر كل شوية بحال، وتعب جامد ده طبعا غير الخوف والقلق فاتصلت بالاسعاف، وبعد شوية جت الاسعاف ومن هنا أنا بقيت شاهد عيان.
تليفوني بيرن .. اختي بتبلغني ان مدام هـ تعبانة أوي ومحتاجة مستشفي عزل ضروري والاسعاف هتوديها علي مستشفي المبره في المعادي وفعلا راحت هناك.
ومن ناحية تانية وزارة الصحة بتقول احنا بعتنا لها عربية اسعاف والمفروض تروح مستشفي الحومدية ولست مراحتش.
كلمت مدام هـ انتي لسه في المبره ليه ..
مدام هـ تقولي: جوزي قالي هتتبهدلي في المستشفي ومحدش هيسال فيكي والمستشفي مش كويسة وخايفة اروح هناك، انا هعمل الاشاعات والتحاليل واروح.
وبصراحة طاقم مستشفي المبره سلبي جدا ودي بقي حكاية تانية. ده غير السبوبة اللي بيعملوها.
اكلم زوج الست هـ يقولي: هي هتروح البيت انا كنت بشوف مستشفيات الحكومة والناس بتتبهدل وهي خلاص كام يوم كمان وتخف وفترة المكروب هتروح…. وانا اقوله مفيش حاجة كدا لازم تروح المستشفي حالتها صعبه .. يقولي لاء هتروح البيت.
زوج الست هـ قال لعربية الإسعاف امشي احنا هنروح البيت.
وسائق عربية الاسعاف (المسعف) ايوه يا استاذ عندك حق المستشفي مش كويسة وهتتبهدل اسالنا احنا .. السلامو عليكو.
عربية الاسعاف مشيت والست هـ تعبت جدا في الشارع و وزارة الصحة بتتصل بيها وتسأل ليه يا مدام هـ مش عايزة تروحي المستشفي انا فلان، والست هـ مش مصدقة مين اللي بيكلمها وبفطرتها ردت وقالت قالولي هيبهدلوني هناك ومحدش هياخد باله مني.
ورد عليها فلان من الوزارة وقالها احنا بردوا هنعمل في الناس كدا يا مدام هـ احنا مستنينك في مستشفي الحومدية وما تخفيش من حاجة وهتشوفي بنفسك يا مدام هـ، ابعت لك عربية الاسعاف تاني، وردت الست هـ وقالت حضرتك طمنتني يا دكتور انا هتوكل علي ربنا واروح ومستنية الإسعاف. (طبعا دكتور فلان سال مين اللي قالك كدا والست هـ خافت تقول ان المسعفين هما اللى قالوا لهم ان المستشفيات مش كويسة ولما سالتها ليه مش قولتي قالت خفت اقطع عيشهم حرام)
نرجع تاني لمشهد زوج الست هـ اللي بيزعق في الشارع وقال انا هسبكوا وامشي والست هـ خدت قرارها وشجعناها بس صوتها بان عليه التعب والقلق والخوف ومنتظره عربية الاسعاف للمرة التانية.
وبعد دقايق الاسعاف جت وخدت الست هـ وراحت مستشفي العزل وكانت المفاجئة من الاستقبال.
اتصلت بيها .. الو مدام هـ طمنيني عليكي عامله ايه .. ومدام هـ بتقول يا استاذ سيد الناس اللي قالوا لي المستشفي وحشه طلعوا كدابين اوي ومفتريين، المستشفي زي الفل ونظيفة اوي وفي غرفة لوحدي فيها ثلاجة وسرير وحمام وعملوا لي تحاليل واشاعات وكشفوا عليا وجابولي اكل وغيرولي هدومي ربنا يحفظهم وكل شوية دكتور يمر عليا وخدت علاجي. العلاج اللى هنا غير اللي بره خالص وحسيت براحه عليه ربنا يسترهم. انا صرفت كتييير على الدكاتره بره ومفيش نتيجة.
الست هـ في المستشفي واول نتيجة مسحة طلعت ايجابية وبتاخد العلاج وبعد اسبوع المسحة طلعت سلبية وخرجت من المستشفي وهي بتدعي للطاقم الطبي وروحت بيتها، وزوجها واولادها فرحانيين اوي بيها، ادعولها ربنا يتمم شفاها على خير ويحفظ مصر من الاشاعات والحاقدين وقبل كل ده يحفظها من الجهل.
دي كانت معركة إقناع شخص استمرت اربع ساعات (طبعا زوج الست) ومجهود وزارة الصحة كان كبير فيها جدا بل هو بطل حكاية الست هـ . وبين الطرفين انا متابع الاتنين مهو انا شاهد عيان. بس يا تري لو الست هـ كانت فاقده الوعي ولم تُصر على انها تروح المستشفي كان هيبقي ايه مصيرها. بس ربنا كريم.
 
شكرا جيش مصر الابيض
تحياتي
سيد عبد العزيز

الاقسام اخبار

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *